कार्यक्रममा ढिलो आएको भन्दै सुनसरीमा एक पत्रकारलाई कुटपिट - समृद्धि खबर

Pages

Breaking

Thursday, December 12, 2019

कार्यक्रममा ढिलो आएको भन्दै सुनसरीमा एक पत्रकारलाई कुटपिट

इनरुवा, २७ मंसिर ।  


नेपाल पत्रकार महासंघ सुनसरीका उपाध्यक्ष तथा ‘न्यूज २४’ टेलिभिजनका ब्यूरो प्रमुख सन्तोष काफ्लेमाथि कुटपिट भएको छ । सुनसरीको धरानमा आयोजना गरिएको पत्रकार सम्मेलनमा ढिला आएको र न्यूज २४ टेलिभिजनको ‘सिधा कुरा जनतासँग’ कार्यक्रममा आफूहरुको समाचार प्रसारण नगरिदिएको भन्दै काफ्लेमाथि कुटपिट भएको हो ।

कुटपिटबाट काफ्लेको नाक र ओठमा चोट लागेको नेपाल पत्रकार महासंघका, जिल्ला शाखा सुनसरीका सचिव हिमाल दाहालले जानकारी दिएका छन् । उपाध्यक्ष काफ्लेको बिपी कोइराला स्वास्थ्य विज्ञान प्रतिष्ठान धरानमा उपचार भइरहेको छ ।

धरानमा रहेको सल्लेरी बचत तथा ऋण सहकारी संस्थाका सञ्चालकबाट ठगीमा परेका पीडितहरुले बिहीबार आयोजना गरेको पत्रकार सम्मेलनमा महासंघका उपाध्यक्ष तथा न्यूज २४ टेलिभिजनका ब्यूरो प्रमुख काफ्लेले ढिलो आएको तथा सिधा कुरा जनतासँगको कार्यक्रममा आफूहरुको समाचार प्रसारण नगरेको भन्दै कुटपिट गरेको बताइएको छ ।

सो संस्थाका सञ्चालक धरानमा रहेका सर्वसाधारणले बचत गरेको रु. ८ करोड ६५ लाख लिएर भागेको विरोधमा पीडितहरूले पत्रकार सम्मेलन गरेका थिए । प्रहरीले कुटपिटमा संलग्न भएको आरोपमा ३ जनालाई नियन्त्रणमा लिएको छ । पक्राउ पर्नेमा नरेश शाही, दीपक राई र एक महिला रहेको जिल्ला प्रहरी कार्यालय सुनसरीले जनाएको छ ।

यसैबीच पत्रकार महासंघ सुनसरीले बिहीबार एक विज्ञप्ति जारी गर्दै कुटपिटको घटनामा दोषीलाई कडा कारवाही गर्न माग गरेको छ । कार्यक्रममा ढिलो उपस्थिति भएकामा कुटपिट गर्नेलाई कडाभन्दा कडा कारवाही गर्न माग गरेको महासंघका सुनसरी सचिव दाहालद्वारा हस्ताक्षरित विज्ञप्तिमा उल्लेख छ । विज्ञप्तिमा प्रेसको संवैधानिक अधिकारको सम्मान गरी निर्वाध र भयरहित काम गर्ने वातावरण बनाउन सम्बन्धित निकायसमक्ष मागसमेत गरिएको छ । 



No comments:

Post a Comment

Post Bottom Ad